Кај една домашна мачка во Англија е потврдена зараза со коронавирус. Управителката на ветеринарната служба, Кристин Мидлмис, изјави дека станува збор за редок случај во кој мачка е заразена со коронавирус во Велика Британија.
Според Independent, мачката била заразена од нејзините сопственици, кои биле позитивни на COVID-19. Во меѓувреме сите оздравеле, дури и мачката и вирусот не е пренесен понатаму ниту на луѓе, ниту на животни, соопшти британската влада.
Британскиот институт за јавно здравје препорачува граѓаните редовно да ги мијат рацете пред и по контакт со животни.
Во сите случаи на заразени животни досега симптомите биле благи, а домашните миленици оздравеле за неколку дена.
Научниците веруваат дека луѓето можат да заразат животни со вирусот, но не и обратно, бидејќи нема докази за пренесување на вирусот од животни на луѓето.
