Лош крај на љубовта помеѓу крилниот напаѓач и штипска Брегалница.
Еден од најдобрите фудбалери кои сезонава беа дел од втората македонска фудбалска лига од денеска не е повеќе дел од штипска Брегалница, од клубот кој на лето го засили за да го однесе во првата лига. 30-годишниот крилен напаѓач не е ниту на зимските подготовски кои амбициозната Брегалница ги реализира во Анталија.
Стојанчо Велинов на Facebook си ги откри маките, како клубот веќе некое време не само што не му ја давал платата, не го играл, туку и му забранувал да тренира, а не му дозволувал ниту да се пресели во нов клуб. Такви се обвинувањата кои Велинов ги испрати кон штипските „Сини“.
Велинов кариерата ја почна токму во Брегалница од каде потоа играше и за Тетекс, Силекс, Ренова, Работнички, косовска Трепча 89 и Академија Пандев. Лани со струмичкиот клуб го освои Купот на Македонија каде беше стрелец на последниот пенал во финалето против Македонија ЃП.
Брегалница на полусезона е на второто место во 2.МФЛ Исток со три бодови заостанување зад лидерот Беласица.