Бројот на граѓани кои користат велосипед како основно превозно средство постојано расте, што е голем плус за секој модерен град.
Но, со растењето на бројот на вело-ентузијасти, расте и бројот на проблеми со кои се соочуваат, особено од инфраструктурен карактер.
Многу често, немањето инфраструктура или нејзината несоодветна поставеност и одржување ги демотивира луѓето да возат велосипед секој ден до работа или друга дестинација. Не само што знае да биде неудобно, возењето на места што не се назначени како велосипедски патеки може да биде и опасно, колку и да внимаваме.
Групата ентузијасти #НаТочак, чија заедничка цел е подобро велосипедско Скопје, информира, едуцира и апелира и на оваа тема.
Кога улицата е тесна и нема доволно простор за тротоари и велосипедски патеки, па моторизираниот и немоторизираниот сообраќај треба да се меша, тогаш мешањето треба да се направи на безбеден начин, пишуваат тие во објава на социјалните мрежи.
„Коловозот се стеснува, се користат издигнување на местото на пешачките премини, се користат други материјали и бои за да им укажат на возачите дека не се тие тука главни. Можат да се движат, но со големо внимание. Многу маалски улички во Скопје треба да се решат на ваков начин“, предлагат од #НаТочак.
Практично, секоја улица треба да има решение за пешачки и велосипедски сообраќај. Ако нема издвоен простор за пешаци и велосипеди, мора да го смири моторниот сообраќај до 30, 20 или 10 км/ч.
Кога има издвоени комотни тротоари и издвоени велосипедски патеки, само на тие улици смее да се вози до 50 км/ч, апелираат од #НаТочак.
Дали вие возите велосипед во урбана средина?
Кои се Вашите искуства со вакви ситуации?