Во најбогатата земја со нафта во светот ситуацијата е многу напната. Војската на Венецуела одби да го признае претседателот на парламентот, Хуан Гуаидо, кој се прогласи за претседател на државата иако на чело се наоѓа Николас Мадуро.
„Војниците не го признаваат претседателот кој ни е наметнат под влијание на странските интереси, незаконито и самопрогласено. Вооружените сили го бранат Уставот и гарантираат национален суверенитет“, напиша на Twitter Падрино Лопез, министер за одбрана.
Николас Мадуро ги прекина односите со САД и на американските дипломати им даде рок од 72 часа да ја напуштат земјата, откако Вашингтон го призна Гуаидо за претседател на Венецуела. Демонстрантите се против него, бараат негова смена и велат дека им е доста од хиперинфлација, недостиг на лекови и храна, мигрантска криза поради која милиони семејства се разделени.
Опозицискиот лидер Хуан Гуаидо се самопрогласи за привремен претседател и досега е признаен од САД, Канада, Бразил, Аргентина, Колумбија, Парагвај, Чиле, Перу, Гватемала, Костарика, Албанија.
Во протестите против Мадуро во Сан Кристобал вчера загинаа двајца, а повредени се уште петмина, соопштија властите во Венецуела. Двајцата демонстранти се убиени од огнено оружје.
Мадуро доби поддршка од турскиот претседател Реџеп Таип Редоган.
„Брате Мадуро, главата горе, Турција е со тебе“, му рекол Ердоган на својот колега во телефонски разговор. Тоа на Twitter го наведе неговиот портпарол, Ибрахим Калин.
