Арсен Венгер после 22 години одлучи да ги напушти редовите на Арсенал, потклекна пред притисокот од сите страни и одлучи да се повлече од саканиот клуб.
Така, тој ќе си замине една година пред истекувањето на соработката со клубот, а се очекува притоа да добие и голема отштета за последниот договор кој претходно го потпиша со клубот, но Французинот нагласи дека неговото заминување од Арсенал не значи и повлекување од фудбалот.
Британските медиуми сега пренесуваат дека Венгер, од наредната сезона би можел да биде претседател на новиот првак на Франција, Парис Сен Жермен.
„Светците“ минатиот викенд си ја обезбедија седмата титула во историјата на клубот, но и покрај тоа се очекува Емери да си замине, а на клупата да го наследи Томас Тухел, кој долго важеше за главен кандидат за клупата на Арсенал, па така Венгер во продолжение на кариерата би можел да соработува со човекот за кој многумина веруваа дека би можел да го наследи во Северен Лондон.
Идејата на управата на клубот од „Паркот на принцовите“ е Тухел од лето да биде шеф на стручниот штаб на тимот, а искусниот Венгер да стане претседател, па така во ПСЖ би можеле да го искористат големото знаење на Венгер, но и предолгата листа на контакти, со која Французинот се стекна за 22 години работа во редовите на Арсенал.
Идејата е јасна, ПСЖ силно посакува да ја освои Лигата на шампионите, а се чини дека ова е вистинскиот рецепт за такво нешто.
Останува да видиме дали Венгер е подготвен за нова улога во фудбалскиот свет, или можеби и понатаму сака да продолжи да тренира, за што несомнено ќе добие бројни понуди во наредниот период.
