Веќе е очигледно дека до крајот на оваа недела Алексис Санчез нема да биде член на Арсенал, но изгледа дека Арсен Венгер има план како да го замени напаѓачот. Пјер Емерик Аубамејанг е главната цел на Арсенал за овој јануарски трансфер период.
Габонскиот напаѓач е во лоши односи со тренерот и раководството бидејќи му го стопираа трансферот во летниот преоден рок, и сега повторно е на излезна врата, но челниците на клубот чекаат некој тим да ја исплати целата цена која ја бараат за него.
Аубамејанг не беше во составот на Борусија Дортмунд на натпреварот против Волфсбург, а тренерот Питер Штогер рече дека тоа се должи на дисциплински мерки кои клубот ги преземал против напаѓачот.
Сумата која Арсенал е спремен да ја понуди за Аубамејанг е 53 милиони фунти, што не е ни приближно до она што Борусија минатото лето го бараше за него. Кога се шпекулираше дека тој би можел да направи спектакуларно враќање во Милан, „Милионерите“ бараа повеќе од 75 милиони фунти за него.
Навивачите на Арсенал се надеваат дека по крајот на сезоната Венгер ќе си оди од клубот, па можеби ова ќе биде неговиот последен потег во долгата кариера во Лондон.
