Веќе подолго време тимот на Арсенал е без еден од најдобрите играчи во изминатите неколку сезони, а Арсен Венгер ја нарече неговата повреда „најлошата што некогаш ја има видено“.
Санти Казорла е надвор од терените повеќе од една година, неговиот последен настап беше во октомври 2016 година, а неговиот тренер се надева дека тој ќе може да ја преброди повредата.
Шпанецот има повреда на Ахиловата тетива и вели дека од ден на ден се чувствува сѐ понемоќен. Неколкупати пробал да се врати на редовните тренинзи со екипата, но чувствувал голема болка и тоа го деморализирало.
„Ова е најлошата повреда што ја имам видено во мојата тренерска кариера, а верувајте, сум видел многу. Почна како обична болка и секој ден стануваше сѐ полошо“, изјави Арсен Венгер на едно неодамнешно интервју.
Според докторската екипа на Арсенал, Санти Казорла би требало да се врати на терените во јануари, но Венгер вели дека не сака да брза со рехабилитацијата.
„Знам колку Санти сака да му помогне на тимот, но мислам дека е подобро најпрво целосно да се опорави, па потоа да мисли на враќање“, додаде тој.
