И покрај предвидувањата дека на крајот на сезоната ќе го напушти Арсенал, тренерот Арсен Венгер(67) одлучи да остане уште една година со „топчиите“, објавија британските медиуми.
Венгер веќе 21 година го предводи Арсенал, со кој трипати беше првак на Англија. Но, последниот наслов го освои пред 13 години. На крајот на оваа сезона му истекува договорот и медиумите предвидуваа негово заминување од клубот.
Но, се чини дека францускиот тренер се премислил и на клупската управа и испратил попис на засилувања за следната сезона. Венгер сака да го донесе крилото на Лестер, Ријад Марез (26) и стоперот на Мидлзброу, Бен Гибсон (24).
Британските медиуми проценуваат дека доведувањето на Марез и Гибсон би можело да чини околу 55 милиони фунти. Покрај тоа, Венгер сака да донесе напаѓач, лев бек и голман.
