Францускиот тренер Арсен Венгер денеска официјално објави дека ја напушта клупата на Арсенал по 22 години на тренерската позиција на англискиот клуб. Тој има најдолг стаж во Премиер лигата од сите активни тренери.
По неколкугодишен притисок од навивачите, Арсен Венгер денеска (20.04.2018) рано наутро најави дека го напушта кормилото на Арсенал.
„По долго размислување и разговори со управата, одлучив дека најдоброто нешто што можам да го направам е да си заминам од Арсенал по крај на сезоната. Благодарен сум што сите овие години можев да му служам на клубот. Би сакал да им се заблагодарам на сите вработени, сите играчи, управата и навивачите кои го прават овој клуб толку посебен“, изјави Венгер.
Тој беше на чело на Арсенал цели 22 години, но последните неколку години ги помина без особен успех, што предизвика негодување кај навивачите.
Арсен Венгер останува легенда на Премиер лигата со 823 натпревари на клупата на Арсенал, од кои 473 беа победи, 199 нерешени и 151 пораз. За тоа време тој освои 3 титули во Премиер лигата и 7 трофеи од ФА купот, повеќе од било кој тренер во историјата.
„Барам од навивачите да застанат зад клубот и да ни помогнат да ја завршиме сезоната на високо ниво. Сите навивачи на Арсенал треба да се грижат за вредностите на овој клуб. Мојата љубов и посветеност секогаш ќе остане со Арсенал“, додаде Венгер.
Вчера Арсен Венгер напомена дека поранешниот играч на Арсенал, Патрик Виера, го гледа како идеален наследник на тренерската позиција на лондонскиот клуб.
Следниот натпревар на Арсенал ќе се одигра во недела од 14:30, кога на домашен терен ќе го пречека градскиот ривал Вест Хем.