Верстапен остро го критикуваше Расел: Изгубив секаква почит кон него

Возачот на Ред Бул, Макс Верстапен, изјави дека ја изгубил сета почит кон Џорџ Расел од Мерцедес, откако Холанѓанецот беше казнет на трката за Големата награда на Катар во шампионатот во Формула 1.

Верстапен беше најбрз во саботата во квалификациите за Големата награда на Катар, додека второто место го освои Расел. Сепак, организаторите на трката му го одзедоа првото место на Верстапен бидејќи беше утврдено дека актуелниот светски шампион возел непотребно бавно во загревачкиот круг и на тој начин го спречил Расел да постигне подобар резултат.

Верстапен доби казна од едно место, поради што трката за Големата награда на Катар во недела ја започна од второто место, зад Расел. Во неделата, возачот на Ред Бул го престигна Расел на почетокот на трката и на крајот успеа да победи, додека Британецот го освои четвртото место на Големата награда на Катар.

„Бев прилично изненаден во таа соба со стјуардите, поради сѐ што се случуваше. Да бидам искрен, тоа беше многу разочарувачки бидејќи мислев дека сите се почитуваме. Сум бил во таа сала за состаноци многу пати во животот, во мојата кариера со луѓе со кои се тркав, никогаш не сум видел некој да се обиде толку многу да наштети некому... Изгубив секаква почит кон Расел“, рече Верстапен.

BBC пренесува дека Верстапен разговарал со Расел за сѐ пред трката и дека му дал до знаење дека е незадоволен од неговото однесување.

Верстапен е прв во генералниот пласман на возачи со 429 бодови. Тој веќе ја обезбеди својата четврта последователна шампионска титула во Ф1.

Последната трка сезонава во шампионатот ќе се вози на 8 декември за Големата награда на Абу Даби.