Возачот на Ред Бул, Макс Верстапен, славеше на трката за Големата награда на Мексико и направи огромен чекор кон светската титула во Формула 1.
Возачите на Мерцедес, Валтери Ботас и Луис Хамилтон, тргнаа од првата стартна линија, но Верстапен ги претекна непосредно пред првиот свиок.
Даниел Рикардо од Мекларен во првиот свиок го удри Ботас, по само неколку стотини метри им ја уништи трката на двајцата, а на патеката излезе безбедносно возило зад кое возачите ги извозеа првите четири круга.
Верстапен рутински го задржа првото место кое никогаш не беше загрозено, а за второто имаше интересна борба.
Хамилтон жестоко се бранеше од тимскиот колега на Верстапен, Серхио Перес, и на крајот успеа.
Верстапен ја зголеми предноста пред Хамилтон на 19 поени со својата деветта победа сезонава. До крајот на сезоната остануваат уште четири трки, а следната е закажана за Големата награда на Бразил наредната недела.