Саудискиот принц Мохамед бин Салман е познат како личност која не жали што троши пари, понекогаш на проекти кои на никого во светот не му изгледаат логично.
Сега Салман одлучи дека е паметно Саудиска Арабија да биде домаќин на Азиските зимски игри. Така што натпреварите за кои треба снег и мраз сега ќе се одржуваат во пустина. И тоа во град кој сè уште не постои.
Кандидатурата на Саудиска Арабија за домаќин на Азиските зимски игри во 2029 година беше едногласно одобрена за време на 41. Генерално собрание на Олимпискиот совет на Азија (ОЦА), а Игрите ќе се одржат во Неом.
Неом е град кој се гради во северозападниот дел на Саудиска Арабија, а саудискиот инвестициски фонд ПИФ, со кој управува Салман, и кој во сопственост го има премиерлигашот Њукасл, одлучи да инвестира 500 милијарди американски долари во неговата изградба.
Изградбата започна во 2017 година, досега се изградени само два облакодера, но Салман со години ја уверува нацијата дека градот ќе биде подготвен за првите жители веќе во 2026 година.
До градот има планински масив на кој Салман има намера да изгради скијачки центар наречен Троџена каде што патеките ќе бидат отворени цела година благодарение на вештачкиот снег.
На Игрите во 2029 година спортистите и спортистките ќе се натпреваруваат во 47 спортови, од кои 28 се на снег и 19 на мраз. Азиските зимски игри се одржуваат од 1986 година, а досега се одржувале во Јапонија, Кина, Јужна Кореја и Казахстан, земји каде има идеални услови за зимски спортови.
