Расел Вестбрук ноќеска го постигна својот трипл-дабл број 181 во кариерата и со тоа си обезбеди место во историјата на најдобрата кошаркарска лига на светот.
Вашингтон Визардс на гости кај Индијана Пејсерс тесно славеше со 133:132 по продолженија, а Вестбрук во победата учествуваше со трипл-дабл од 33 поени, 19 скокови и 15 асистенции и го засени дури и својот соиграч Бредли Бил кој заби неверојатни 50 поени.
Всушност, Вестбрук го направи она кое никој не го очекуваше - се израмни по бројот на трипл-дабли во кариерата со легендарниот Оскар Робертсон. Јасно е дека Вестбрук во иднина ќе направи барем уште еден трипл-дабл и со тоа ќе избие сам на вечната листа, достигнување кое тешко дека некој во скоро време ќе го надмине.
Не само што влезе во историјата, туку тоа го направи на начин што ѝ донесе победа на својата екипа. Ги реализираше двете слободни фрлања за 133:132 на секунда пред крајот, а потоа го блокираше ударот на Карис ЛеВерт за победа на Индијана.
Вашингтон сезонава се мачи, со оваа победа всушност ја мина Индијана на табелата во Истокот каде има скор од 32-36 и е 9-ти, додека Индијана со 31-36 е 10-та.
Резултати:
Индијана Пејсерс - Вашингтон Визардс 132:133 прод.
Филаделфија 76ерс - Детроит Пистонс 118:104
Торонто Репторс - Мемфис Гризлис 99:109
Денвер Нагетс - Бруклин Нетс 119:125
Голден Стејт Вориорс - Оклахома Сити Тандер 136:97
Портланд Треил Блејзерс - Сан Антонио Спарс 124:102
Јута Џез - Хјустон Рокитс 124:116