Федералната трговска комисија на САД (FTC) и 22 држави поднесоа тужба против Amazon, обвинувајќи го онлајн трговецот на мало за вештачко зголемување на цените што компаниите ги плаќаат за рекламирање на својата платформа, со што потенцијално заработуваат десетици милијарди долари, објави dpa.
FTC тврди дека Amazon тајно ги зголемува цените на рекламните аукции повеќе од седум години. Адвокати од 22 држави се приклучија на тужбата.
„Повисоките трошоци за работењето на Amazon во голема мера ги сносат американските потрошувачи“, рече претседателот на FTC, Ендру Фергусон, додавајќи дека последиците можат да бидат огромни кога еден од најголемите онлајн трговци на мало во светот се вклучува во нефер и измамнички практики.
Акциите на Amazon паднаа за околу 2,5 проценти во понеделникот. Компаниите му плаќаат на Amazon за да ги прикажуваат своите реклами покрај одредени резултати од пребарувањето, а рекламниот простор се распределува преку аукции.
Според правилата што Amazon јавно ги објави, победникот на аукцијата не го плаќа целиот износ од својата понуда, туку само еден цент повеќе од втората највисока понуда. Ако, на пример, едната компанија понуди 200 долари, а другата 190 долари, победникот би платил 190,01 долари за рекламниот простор, вели FTC.
Но, Amazon ја наплатил целосната цена на понудата во речиси четири од пет аукции за рекламен простор, што, според FTC, ги прекршило сопствените правила.
FTC вели дека внатрешните документи на компанијата ги потврдуваат ваквите практики, вклучително и споменување на „скриен дополнителен трошок“ во начинот на кој се одредуваат цените на аукциите.
Amazon наводно дополнително ги зголемил цените со користење на фиктивни понудувачи на аукциите.
Во тужбата се тврди дека тајните зголемувања на цените биле воведени поради незадоволство од приходите од рекламните аукции.
