Цените на нафтата на меѓународните пазари повторно се искачија над 110 долари, под влијание на зголемените геополитички тензии поради најновите настани на Блискиот Исток.
На лондонскиот пазар, барел нафта од типот Брент се тргуваше попладне по цена повисока за 2,44 долари отколку што беше во петокот кога изнесуваше 110,61 долари. Минатата недела цените накратко ги надминаа 126 долари, но потоа беа корегирани надолу. На американскиот пазар, барел нафта од типот WTI се искачи за 1,38 долари во денешната трговија, на 103,32 долари.
Во фокусот на пазарот беше новата иницијатива на американскиот претседател Доналд Трамп, наменета за олеснување на транзитот на бродовите заглавени во Ормутскиот Теснец.
Во неделата, Трамп објави дека САД ќе започнат операции за спасување на бродови на неутрални земји заглавени во теснецот.
Тој го опиша потегот како „хуманитарен гест“ чија единствена цел е да им помогне на неутралните земји кои не учествуваат во војната меѓу САД и Израел против Иран.
На својата платформа Truth Social, тој предупреди дека решително ќе одговори на секое попречување на иницијативата што ја нарече „Проект слобода“.
Цените на нафтата пораснаа бидејќи трговците се сомневаа дека американскиот план ќе успее, додека разговорите меѓу Вашингтон и Техеран за завршување на војната сè уште се сметаа за ќорсокак.
Денеска воената команда на Иран се закани со напади. Товарните бродови што сакаат да поминат низ теснецот ќе мора да се координираат со вооружените сили на Иран, изјави командантот на Централната воена команда, Али Абдолахи Алиабади.
„Предупредуваме дека сите странски вооружени сили, особено агресивната американска војска, ќе бидат нападнати ако имаат намера да се приближат и да влезат во Ормутскиот Теснец“.
Цените накратко скокнаа за околу 5 проценти во раното тргување откако иранската државна новинска агенција објави дека иранската морнарица спречила „американско-ционистички“ воени бродови да влезат во Ормутскиот Теснец.
Иранската новинска агенција Fars соопшти дека две ракети погодиле американски воен брод во близина на пристаништето Јаск откако ги игнорирало иранските предупредувања.
Reuters не можеше независно да ги потврди извештаите. Висок американски функционер негираше дека американскиот брод бил погоден од ирански ракети, изјави во понеделник новинарот на Axios Барак Равид.
Медиумските извештаи ги поттикнаа стравувањата од продолжено нарушување во Ормутскиот Теснец, клучна бродска линија за транзит на нафта.
Одделни пресметки од Организацијата на земјите извознички на нафта (ОПЕК) покажаа дека барел од кошничката сирова нафта на нејзините земји-членки беше за 7,40 долари повисока во петокот отколку еден ден претходно, на 121,11 долари.
