Цените на нафтата паднаа на меѓународните пазари, еден ден откако САД започнаа акција насочена кон повторно отворање на Ормутскиот Теснец. Сепак, падот на цените е ограничен и цените сè уште се движат над 110 долари.
На лондонскиот пазар, барел нафта од типот Брент се тргуваше попладнето по 112,61 долари, што е за 1,83 долари или 1,6 проценти пониско отколку на затворањето на тргувањето претходниот ден, кога завршија со зголемување од 5,8 проценти. На американскиот пазар, цената на барел нафта од типот WTI падна за 2,5 долари, или 2,35 проценти, на 103,92 долари, откако порасна за 4,4 проценти во понеделникот.
Бродската компанија Maersk објави дека Alliance Fairfax, носач на возила под американско знаме, управуван од нејзината подружница Farrell Lines, го напушти Персискиот Залив преку Ормутскиот Теснец во понеделникот во придружба на американските воени сили.
„Тоа покажува дека ограничен безбеден премин е можен под сегашните услови и помага да се ублажат некои од најлошите стравувања од прекини во снабдувањето“, изјави Тим Вотерер, главен аналитичар на пазарот во KCM Trade, во е-пошта. „Сепак, тоа е сè уште еднократен настан, а не целосно повторно отворање“, додаде тој.
Иран започна напади во Персискиот Залив во понеделникот за да се спротивстави на обидите на САД да ја преземат контролата врз Ормутскиот Теснец, клучен воден пат за транзит на нафта и гас од Блискиот Исток. Неколку трговски бродови во Заливот пријавија експлозии или пожари во понеделникот, а пожар избувна во нафтено пристаниште во Обединетите Арапски Емирати, каде што се наоѓа голема американска воена база, по иранските ракетни напади.
Американската војска соопшти во понеделник дека уништила шест ирански мали чамци, како и крстосувачки ракети и беспилотни летала, откако американскиот претседател Доналд Трамп ја испрати морнарицата да ги придружува танкерите низ Ормускиот теснец како дел од иницијативата што ја нарече Проект Слобода.
„Цените продолжуваат да се движат во опсег каде што значително флуктуираат, во голема мера поттикнати од тековните тензии во Ормутскиот Теснец“, рече Пријанка Сачдева, виш аналитичар на пазарот во Phillip Nova.
„Иако цените малку се намалија во последните денови, ова не се должи на вистинско подобрување на фундаменталните фактори, туку на привремено олеснување откако САД започнаа иницијатива наречена 'Проект слобода'“, додаде таа.
Одделни пресметки од Организацијата на земјите извознички на нафта (ОПЕК) покажуваат дека барел од кошничката нафта на нејзините членки бил за 4,57 долари поевтин во понеделникот отколку минатиот петок, чинејќи 116,54 долари.
