Меѓународната организација за цивилно воздухопловство (ICAO), тело на ОН одговорно за изготвување правила за воздушниот сообраќај, планира голема ревизија на постоечките правила за аеродромите и авиокомпаниите со воведување „дигитален патен документ“.
Овој систем ќе им овозможи на патниците да ги складираат податоците од пасошот на мобилни уреди што би се користеле во текот на нивното патување. Според Times, промените би можеле да стапат на сила во рок од три години.
Во моментов, патниците мора да се чекираат (check-in), или онлајн или на аеродром. Потоа им се издава карта за патување со баркод, кој потоа мора да го покажат на повеќе контролни пунктови, вклучително и при влегувањето.
Промените што се најавуваат ќе ја елиминираат потребата од карти за качување и пријавување. Наместо тоа, патниците при резервацијата на летот би преземале „патна пропусница“ (journey pass) на својот телефон. Доколку има промени во резервацијата, пропусницата ќе се ажурира автоматски.
Патниците, исто така, ќе може да го стават својот пасош на телефонот и да користат препознавање на лицето за да поминат низ аеродромот. Наместо досегашното чекирање, со кое авиокомпаниите добиваат информации за тоа кој планира да се качи во авионот, во иднина автоматски ќе бидат информирани кога патникот ќе пристигне на аеродромот и кога ќе му се скенира лицето.
Валери Виале, директор за управување со производи во технолошката компанија Amadeus, изјави за Times дека промените се „најголеми во последните 50 години“.
„Последното големо подобрување беше воведувањето на е-билети во раните 2000-ти. Индустријата сега одлучи дека е време да се модернизира – кон системите што ги користи, на пример, Amazon“.
За успешно спроведување на промените, аеродромите ќе треба да инвестираат во инфраструктура за препознавање лица и системи кои ќе можат да читаат пасоши од мобилни уреди.
„Многу авионски системи не се променети повеќе од 50 години, бидејќи сè треба да биде компатибилно и интероперабилно“, рече Виале.
Новата технологија може да предизвика загриженост за приватноста, но Amadeus тврди дека развиле систем во кој сите лични податоци се бришат 15 секунди по секој контакт со системот - на пример на безбедносни контролни пунктови.
Ќе се промени и начинот на постапување со одложувањата и пропуштените поврзувачки летови. Во новиот систем, патниците кои ќе го пропуштат својот поврзувачки лет поради доцнење што не е нивна вина, ќе добиваат известување на мобилниот телефон со детали за новиот лет, а нивната пропусница ќе биде автоматски ажурирана за да им се овозможи да се качат на новиот лет.
