Квалитетот на арабиката во Бразил е во опасност поради обилните дождови, кои ги зголемуваат цените на кафето и влијаат на глобалниот пазар.
Големите температурни промени ова лето, сушите во еден дел од светот и обилните дождови во друг, влијаеја на квалитетот и приносот на храната. Така, во Бразил во опасност е арабиката.
Бразил е на добар пат за рекордна жетва, но невообичаено обилните врнежи од дожд на главните плантажи во земјата го загрозија квалитетот на сортата арабика, ограничувајќи ја понудата на зрна кафе од врвен квалитет што се користат во премиум мешавини од големите компании, кои се присутни и на нашиот пазар.
Со оглед на тоа што Бразил произведува околу 45% од светската понуда на арабика, ова би можело да биде голем удар, а новиот проблем доаѓа по последователни периоди на послабо производство, што придонесе за скок на глобалните цени на историски максимум минатата година.
Сепак, овој пат проблемот не е во квантитетот, туку во квалитетот.
Обилните дождови ја загрозија културата арабика во најважниот регион за производство на квалитетно кафе - Сераду Минејру, кој се наоѓа околу 600 километри северно од Саун Паулу. Дождовите паднаа токму на почетокот на бербата, предизвикувајќи голема количина зрели и висококвалитетни плодови да паѓаат од дрвјата и да лежат на земја со денови, натопени во вода.
Резултатот може да биде кафе со несакан вкус на мувла и влага, кое нема да даде премиум вкус и всушност не се препорачува во производството на кафе.
Исто така, втор бран обилни дождови го погоди кафето кое веќе беше расфрлано за сушење, принудувајќи многу производители повторно да го започнат овој деликатен процес.
Ситуацијата на плантажите веќе има влијание врз пазарот. Фјучерсите за арабика се зголемија за околу 35% од јуни, неутрализирајќи голем дел од загубите регистрирани од почетокот на годината, додека падот на квалитетот го отежнува и обновувањето на сертифицираните залихи во магацините на ICE (Intercontinental Exchange) во САД и Европа, кои се близу до најниските нивоа во овој век.
Под нормални околности, околу 30 до 35% од производството во овој регион ги исполнува високите стандарди на ICE. Оваа година тој процент би можел драстично да се намали на само 10% до 15%.
Министерството за земјоделство на САД предвидува дека во сезоната што започнува во октомври, глобалната понуда на кафе ќе ја надмине потрошувачката за 10 милиони вреќи, што би бил најголемиот вишок во последните шест години, првенствено благодарение на рекордната жетва во Бразил, но тоа не значи дека премиум арабика ќе има во изобилство.
Големите компании можеби ќе можат да апсорбираат дел од трошоците, да ги пренесат на малопродажните цени или да го променат составот на нивните мешавини со користење зрна од различно потекло и квалитет.
