Брисел постави јасен рок за Пекинг да го намали својот голем трговски суфицит со ЕУ. Европскиот комесар за трговија Марош Шефчович предупреди дека доколку нема конкретни резултати до октомври, Европската Унија може да прибегне кон построги трговски мерки.
Пекинг мора да покаже конкретни резултати во намалувањето на својот голем трговски суфицит со Европската Унија до октомври, во спротивно би можел да се соочи со построги мерки, предупреди европскиот комесар за трговија, Словакот Марош Шефчович, во интервју за Euronews.
Во сржта на спорот е огромната нерамнотежа во трговските односи меѓу Кина и ЕУ. Кина извезува значително повеќе стоки во Европа отколку што увезува од Европската Унија, додека Брисел предупредува дека кинескиот извоз продолжува да расте, а европските компании истовремено губат пазарен удел во Кина.
Иако преговорите меѓу двете страни се во тек, Шефчович нагласува дека не станува збор само за трговија, туку и за иднината на европската индустрија. Се очекува напредок во следните две недели, додека видеоконференција меѓу Шефчович и неговиот кинески колега Ван Венбао е планирана за средината на септември. Целта е да се постигне договор пред крајниот рок во октомври.
„Ова е високо политичко прашање“, рече Шефчович, истакнувајќи дека европските лидери очекуваат конкретни резултати до октомври.
Неговите зборови уследија по изјавата на претседателката на Европската комисија, Урсула фон дер Лајен, која претходно оваа недела на бизнис форум во Франција изјави дека дијалогот има смисла само ако донесе конкретни резултати.
Доколку преговорите не успеат, ЕУ е подготвена да активира механизми за трговска одбрана.
Шефчович не прецизираше какви мерки би можеле да се воведат, но рече дека Брисел ја завршува подготовката на „инструмент за диверзификација“ насочен конкретно кон намалување на зависноста од Кина.
„Земјите-членки сакаат да видат каде одиме и бараат јасен концепт за решение, еден вид пилот-проект. Се обидувам да го постигнам ова преку преговори, но тие мора да донесат многу конкретни резултати. Во спротивно, секако, ќе има силен политички притисок за воведување, би рекол, построги мерки“, рече Шефчович.
Европскиот комесар ќе отпатува во Кина во октомври, непосредно пред самитот на лидерите на ЕУ во Брисел, каде што трговските односи со Пекинг ќе бидат една од клучните теми.
Сите земји-членки на ЕУ моментално имаат трговски дефицит со Кина.
Односите меѓу Брисел и Пекинг дополнително се влошија во последните месеци. Европската комисија воведе низа мерки со кои се ограничува пристапот на кинеските компании до единствениот пазар, додека Кина се закани со контрамерки.
Во текот на летото, Европската комисија започна неколку истраги за кинески производи поради сомневања за нефер трговски практики. Фон дер Лајен потврди дека овие истраги „значително“ се интензивираат.
Притисокот расте како што се приближува крајниот рок во октомври. Шефчович признава дека подобар пристап за европските компании до кинескиот пазар не може да се постигне преку ноќ, но верува дека дотогаш мора да се постигне барем рамковен договор што би овозможил разговорите да се префрлат на прашањето за неговата имплементација.
„Ова е прашање што ќе одземе повеќе време, сигурно и по октомври. Но, мислам дека дотогаш треба да имаме доказ дека овој пристап функционира“, рече Шефчович.
Европските лидери очекуваат конкретни решенија од Комисијата за намалување на трговските нерамнотежи, особено во чувствителните сектори како што се автомобилската индустрија, медицинските помагала и земјоделско-прехранбените производи.
„Преговорите во моментов се исклучително интензивни. Не мислам дека некогаш сме разговарале со нашите кинески колеги толку често и толку брзо“, заклучи Шефчович.
