Европската комисија денеска усвои мерки за спречување на уништување на непродадена облека, додатоци и обувки со цел да се поттикне рециклирањето и да се намали штетата врз животната средина.
„Ова е уште еден чекор во промовирањето на циркуларна економија низ цела ЕУ“, соопшти Комисијата.
Забраната за уништување на непродадена облека и обувки ќе биде задолжителна за големите компании од 19 јули оваа година, а за средните компании од 2030 година.
Покрај тоа, постојните обврски за известување за големите компании за непродадена облека декларирана како отпад ќе бидат проширени на средните компании до 2030 година.
Се проценува дека од 4 до 9 проценти од непродадените текстилни производи се уништуваат во Европа секоја година пред воопшто да се облечат. Овој отпад генерира околу 5,6 милиони тони емисии на CO2, што е речиси еднакво на вкупните нето емисии на Шведска во 2021 година.
Регулативата за екодизајн за одржливи производи, која стапи на сила во јули 2024 година, има за цел значително да ја подобри одржливоста на производите пласирани на пазарот на ЕУ преку подобрување на нивната циркуларност, енергетски перформанси, рециклирање и издржливост.
Оваа регулатива бара од компаниите да објавуваат информации за непродадените потрошувачки производи што ги фрлаат како отпад. Исто така, воведува забрана за уништување на непродадена облека, додатоци и обувки.
