Фалсификуваната играчка Labubu се повлекува од европскиот пазар поради ризикот од задушување кај децата, како и прекумерни количини на штетни соединенија.
Европскиот систем за размена на информации за небезбедни производи на единствениот европски пазар (RAPEX) нареди повлекување од полиците и уништување на лажните кукли од глобално популарниот бренд Labubu.
Имено, плишаните кукли во облик на чудовишта со метален прстен можат да предизвикаат задушување или алергиски реакции на хемиски супстанции.
„Производот содржи мал дел што лесно може да се одвои (метален прстен). Мало дете би можело да го стави в уста и да се задави. Покрај тоа, пластичниот материјал на играчката содржи прекумерна концентрација на бис(2-етилхексил) фталат (DEHP) и дибутил фталат (DBP) (измерени вредности до 0,02% и 1,64% од тежината, соодветно). Овие фталати можат да му наштетат на здравјето, предизвикувајќи евентуално оштетување на репродуктивниот систем“, наведува Rapex.
Додаваат дека производот не ги исполнува европските стандарди и одредбите од Директивата на ЕУ за безбедност на играчки. Патем, производителот на предметните играчки е Pop Mart, а утврдено е дека станува збор за фалсификат. Земјата на потекло е Кина.
Rapex нареди повлекување од полиците и уништување на „плишаните играчки“ наречени Labubu Have a Seat.
