Авион на British Airways со техничка грешка ја блокираше пистата на лондонскиот аеродром Гетвик, предизвикувајќи проблеми во раните утрински часови. Инцидентот предизвика дури девет авиони да прогласат вонредна состојба, а вкупно 14 летови беа пренасочени кон други аеродроми, пишува Mirror.
Проблемот се појави откако летот број BA2673 на British Airways слета и остана на единствената оперативна писта поради, како што потврди компанијата, „техничка грешка“. Поради блокадата, девет авиони што чекаа да слетаат го активираа меѓународниот сигнал за вонредни ситуации „7700“, најверојатно поради ниско ниво на гориво. Уште пет летови беа пренасочени кон други аеродроми.
Од 14-те пренасочени летови, пет слетаа во Лутон, четири во Станстед и еден на лондонскиот Хитроу. Некои летови беа пренасочени и надвор од Лондон - три слетаа на аеродромот Бирмингем и еден во Бристол.
Засегнатите летови доаѓаа од различни дестинации низ Европа и Северна Африка. Тие вклучуваа летови од Шпанија, Тенерифе, Валенсија, Ланзароте и Фуертевентура. Летовите од Родос и Атина во Грција, Бари и Рим во Италија и Агадир во Мароко исто така беа пренасочени.
An issue at Gatwick as nine (9) flights originally bound for the London airport are currently squawking 7700 (likely due to low fuel). We are working to learn more. https://t.co/HsHBhiVnxD pic.twitter.com/cHSUBcbZlv
— Flightradar24 (@flightradar24) July 14, 2026
British Airways потврди дека имало техничка грешка, но не даде дополнителни детали.
„Нашиот авион слета безбедно, а патниците се симнаа нормално откако беа известени за технички проблем на авионот“, рече портпаролот на компанијата.
Аеродромот Лондон Гетвик, исто така, издаде соопштение.
„Пистата беше накратко затворена рано утрово поради технички проблем со еден авион. Како резултат на тоа, мал број летови беа пренасочени, но поголемиот дел подоцна се вратија во Лондон Гетвик. Како и секогаш, безбедноста е наш врвен приоритет“, рече портпаролот.
Пистата беше повторно отворена непосредно пред 1:30 часот наутро, а летовите на easyJet и TUI беа меѓу првите што слетаа. Еден патник на пренасочениот лет на British Airways го сподели своето искуство на социјалните медиуми.
„Нашиот лет на British Airways слета во Станстед наместо во Гетвик!“, напиша тој. „Сè уште сме во авионот и чекаме да видиме што ќе се случи следно!! Се надеваме дека наскоро ќе бидеме префрлени назад во Гетвик!“, додаде тој.
