Според првичните пресметки, 500-те најбогати луѓе во светот вчера изгубиле вкупно 208 милијарди долари поради големиот пад на цените на акциите по воведувањето царини од страна на администрацијата на претседателот Доналд Трамп.
Ова е четврти најголем еднодневен пад во 13-годишната историја на индексот на милијардери на Bloomberg, а воедно и најголем од врвот на пандемијата COVID-19.
Најголеми загуби се забележани кај челниците на американските технолошки гиганти.
Основачот на Meta, Марк Закерберг загуби најмногу - 17,9 милијарди долари - откако акциите на неговата компанија паднаа за 9 отсто, пишува Bloomberg.
Џеф Безос изгуби 15,9 милијарди долари бидејќи акциите на Amazon исто така потонаа за 9 отсто за еден ден.
Илон Маск загуби 11 милијарди долари, со што вкупните загуби од почетокот на годината до денес достигнаа 110 милијарди долари.
