Прехранбените гиганти Nestlé и Danone се под обновена контрола откако француските, белгиските и швајцарските медиумски извештаи ја доведоа во прашање брзината со која тие повлекоа потенцијално контаминирана храна за бебиња. Порано оваа година, швајцарската Nestlé повлече серии храна за бебиња во неколку европски земји поради можна контаминација со цереулид.
Nestlé France во тоа време изјави дека „превентивно и доброволно“ повлекува одредени серии на формули за бебиња Guigoz и Nidal откако новите истраги открија потенцијално присуство на цереулид, супстанца од бактериско потекло произведена од микроорганизмот Bacillus cereus што може да предизвика дијареја и повраќање. Француски Danone и групацијата Lactalis исто така ја повлекоа храната за бебиња од полиците.
Nestlé соопшти дека изворот на контаминацијата е масло од арахидонска киселина што го добавува една компанија, но одби да ја именува, објави швајцарскиот портал swissinfo.ch, додавајќи дека оттогаш е идентификувана како Cabio Biotech од кинескиот град Вухан.
Cabio Biotech е еден од водечките светски производители на состојката за формули за бебиња и снабдува околу 300 клиенти, вклучувајќи ги Nestlé и Danone, објави белгиската новинска агенција Belga цитирајќи ги извештаите на француските медиуми.
Европската комисија побара од Европскиот орган за безбедност на храната (EFSA) да постави итна научна граница, позната како акутна референтна доза (ARfD), и да ја вклучи во процесот на донесување одлуки за владите и компаниите за евентуално повлекување на производи.
EFSA предложи поставување нова горна граница за цереулид од не повеќе од 0,014 микрограми на килограм телесна тежина за доенчиња. Многу малите бебиња ги варат супстанциите поинаку и им е потребна дополнителна заштита, објаснија тие, забележувајќи дека повраќањето е клучен краткорочен симптом што се користи за поставување ограничувања.
Потоа Франција одлучи да ја намали границата од максимум 0,3 микрограми на килограм телесна тежина за доенчиња на 0,014 микрограми. Истрагата на Radio France, RTBF и RTS покажа дека Nestlé го одложила информирањето на европските власти за присуството на цереулид во храната за бебиња.
Портпаролот на Nestlé изјави дека истражните извештаи содржат „неточни и погрешни информации“, нагласувајќи дека компанијата била целосно транспарентна и соработувала со властите „од првиот ден“. Истрагата го наведе тврдењето на Nestlé дека следела ригорозен процес што вклучувал проценки, проверки на следливост и идентификација на контаминирани производи пред да започне со повлекување на производите од полиците во продавниците.
Danone не одговори веднаш на барањето за коментар за медиумските извештаи. Nestlé претходно соопштија дека првпат открилe ниски нивоа на цереулид во примероците од производите кон крајот на ноември, но престанале да ги користат сите мешавини на добавувачот што содржат масло од арахидонска киселина откако контаминацијата беше потврдена на 24 декември, објави Reuters.
Според консултантската фирма SkyQuest Technology Group, Nestlé контролира речиси една четвртина од глобалниот пазар на храна за бебиња во вредност од 92,2 милијарди долари. Radio France објави дека 838.000 конзерви формула за бебиња биле задржани од 26 декември во фабриката на Nestlé во северна Франција и на други производствени локации.
Производите што веќе беа на пазарот останаа во дистрибутивните канали или во домовите на потрошувачите без официјално повлекување или непосредно известување до европските власти, според извештајот на Radio France, иако прописите бараат непосредно известување кога ќе се идентификува здравствен ризик.
Медиумските извештаи, исто така, соопштија дека Nestlé повлекува производи во Австрија и Германија од 24 декември, додека производите на Danone беа повлечени од продажба во јануари, пред да биде објавено повлекувањето. Nestlé силно го негираa тврдењето.
Обвинителите во француските градови Бордо и Анже ја отфрлија врската помеѓу смртта на две новороденчиња и повлекувањето на формулата за новороденчиња.
Третиот смртен случај е сè уште под истрага. Втората истрага, започната во Мо, е префрлена во Париз, објави Radio France.
