Француските власти почнаа истрага против гигантите за онлајн купување Shein, Temu, AliExpress и Wish под сомнение дека им овозможуваат на малолетници пристап до порнографска содржина на нивните платформи, потврди парискиот обвинител во вторник. Случајот излезе на виделина по скандалот со продажба на секс кукли што личт на деца, објави BBC.
Истрагата беше започната откако националната агенција за заштита на потрошувачите пријави четири компании кај обвинителите во неделата, изразувајќи загриженост за сомнителни производи откриени на платформата Shein.
Канцеларијата на парискиот обвинител изјави за BBC дека платформите се истражуваат за „насилни, порнографски или непристојни пораки“ до кои малолетниците би можеле да пристапат. Shein и AliExpress се исто така истражувани за дистрибуција на порнографска содржина поврзана со деца, додаде канцеларијата.
Случаите се упатени до Париската канцеларија за малолетници (Office des Mineurs), специјализиран оддел на француската полиција одговорен за заштита на малолетници.
AliExpress изјави дека ја сфаќа ситуацијата многу сериозно и дека навредливите огласи, кои ги кршат нејзините правила, се отстранети веднаш штом биле запознаени со нив. „Продавачите за кои ќе се утврди дека ги кршат или се обидуваат да ги заобиколат овие барања ќе бидат казнети во согласност со нашите правила“, се вели во соопштението.
Сингапурскиот трговец на мало Shein објави во понеделник дека ја забранил продажбата на сите секс кукли на својата платформа низ целиот свет. Компанијата, исто така, изјави дека трајно ќе ги блокира сите продажни сметки поврзани со нелегалната продажба на кукли слични на деца и ќе воведе построги контроли.
Temu и Wish исто така беа контактирани за коментар.
Француската агенција за заштита на потрошувачите, Генералниот директорат за конкуренција, потрошувачки прашања и контрола на измами, соопшти дека описот и категоризацијата на секс куклите оставаат „малку сомнеж дека се работи за детска порнографија“ кај овие производи.
Истрагата доаѓа во чувствително време за Shein, кој, и покрај контроверзиите, се подготвува да ја отвори својата прва постојана продавница во Франција денеска. Демонстрантите веќе се собраа пред париската стоковна куќа каде што треба да се отвори продавницата. Shein исто така планира да отвори продавници во други француски градови, вклучувајќи ги Дижон, Ремс и Анже.