Шведската претприемачка Фариба Ванкор, која Швеѓаните ја нарекоа „кралица на отпадот“ е осудена на шест години затвор за нелегално фрлање стотици илјади тони токсичен отпад во најголемиот случај на еколошки криминал во земјата, објавува Guardian.
Ванкор, порано позната како Бела Нилсон и поранешна директорка на компанијата за управување со отпад Think Pink, беше прогласена за виновна по 19 точки од обвинението за сериозна штета на животната средина. Нејзиниот поранешен сопруг Томас Нилсон беше прогласен за виновен по 12 точки од обвинението и осуден на три години и шест месеци затвор.
Од 11-те обвинети кои излегоа на суд во септември минатата година, сите освен еден беа прогласени за виновни за еколошки прекршоци, пресуди Окружниот суд на Седертерн во Худинге, во близина на Стокхолм.
Никлас Шилерквист, еден од судиите во најголемото судење за животната средина во шведската историја, рече дека работењето на Think Pink претставува голема опасност за луѓето и животната средина, споредувајќи го нивниот бизнис модел со пирамидална шема.
„Управувањето со отпадот беше несоодветно или целосно погрешно. Ова предизвика загадување, а во некои случаи и сериозни ризици за луѓето и животната средина“, рече Шилерквист. „Нема сомнение дека на местата каде што беше фрлен отпадот беа извршени еколошки злосторства“, додаде тој.
Think Pink беше ангажирана да го отстрани градежниот отпад од општини, градежни компании, станбени задруги и граѓани, но наместо правилно да го отстрани, компанијата го остави отпадот несортиран и нелегално го фрли на 19 места низ Шведска.
Истражителите пронајдоа високи нивоа на токсични соединенија како што се олово, жива, арсен и други хемикалии кои го загадуваат воздухот, почвата и водата, загрозувајќи ги луѓето, животните и растенијата.
Денес, пет лица, меѓу кои и Фариба Ванкор (поранешна Бела Нилсон) и нејзиниот поранешен сопруг Томас Нилсон, беа осудени на затворски казни од две до шест години за сериозни злосторства во животната средина. Другите петмина добија пократки затворски казни или условни казни. Единственото лице кое беше ослободено од обвинението беше поранешниот директор на Think Pink, телевизиската личност Леиф-Иван Карлсон.
Петте главни обвинети мора да платат отштета од околу четвртина милијарда шведски круни (околу 22,4 милиони евра) на, меѓу другите, општината Боткирка и градот Вестерос. Ова е најголемиот случај што некогаш го водела Националната единица за животна средина и работна средина на Шведска. Судењето траеше неколку години, а пресудата е долга речиси 700 страници.
