На глобалните пазари, цените на нафтата пораснаа за повеќе од 4 проценти минатата недела, што е нивно прво неделно зголемување од средината на април.
Цената на барел на лондонскиот пазар порасна за 4,3 проценти минатата недела, на 63,90 долари, додека на американскиот пазар, барелот порасна за 4,7 проценти, на 61,02 долари.
На почетокот на минатата недела, цените на нафтата нагло паднаа бидејќи осумте производители од Организацијата на земјите извознички на нафта (ОПЕК), предводени од Саудиска Арабија, се согласија да го зголемат производството во јуни за 411.000 барели дневно.
Но, до крајот на неделата, цените на нафтата ги надоместија тие загуби бидејќи трговците се надеваа дека најголемите економии во светот ќе избегнат рецесија, со оглед на тоа што трговската војна, која ја започна американскиот претседател Доналд Трамп на почетокот на април со воведување на реципрочни тарифи, се смирува.
Трговците беа охрабрени од трговскиот договор меѓу САД и Велика Британија, првиот таков договор откако Трамп воведе тарифи.
Најважното нешто во договорот е тоа што Велика Британија ќе ги намали царините за увоз на американски производи од просек од 5,1 на 1,8 проценти, додека царините за британскиот увоз во САД ќе останат на 10 проценти.
Ова ги зголеми надежите на трговците за ублажување на тензиите меѓу САД и Кина на разговорите во Швајцарија за време на викендот.
И Пекинг и Вашингтон сакаат да ги ублажат тензиите, а тоа има позитивен ефект врз пазарите, но веројатно нема да се постигне договор толку брзо, велат аналитичарите.
