Диригентката Дијана Имери Илкоска јавно реагираше по одлуката на Комисијата за спречување и заштита од дискриминација (КСЗД), која утврди дека таа била директно дискриминирана од страна на тогашниот в.д. директор на НУ Филхармонија, Александар Котевски.
Според Комисијата, Имери Илкоска била неправедно лишена од трансформација на работниот однос од определено во неопределено време, добила забрана за влез во институцијата, а нејзиниот уметнички профил бил избришан од официјалната веб-страница токму по нејзината јавна реакција. Комисијата ја оцени оваа постапка како дискриминација, придонесувајќи Дијана да се најде во понеповолна положба во однос на своите колеги.
„Да, бев дискриминирана и сè уште сум. Извинувањето, за жал, нема да ја надомести траумата и болката која ми беше нанесена мене и на целото мое семејство, но ќе покаже дека сè уште постои право и правда кон која сите целиме“, рече диригентката Имери Илкоска, нагласувајќи дека нејзината борба продолжува институционално, но и преку музиката и уметничката дејност, која напредува и покрај обидите да биде маргинализирана и избришана од културната сцена.
Нејзиниот сопруг, пијанистот Дино Имери, во поддршка на сопругата го истакна својот револт кон молкот на многу колеги: „Со Дијана ги следевме концертите на Филхармонија буквално од деца. Години подоцна, како млади професионалци и уметници, со нив ја делевме сцената. Никогаш не сме посведочиле нешто вакво – губење на нејзиното работно место, забрана за влез во својата матична куќа, бришење на уметничкиот профил од официјалната веб-страница и уште многу други постапки кои ја поттикнаа Дијана да бара правда преку институционални механизми. Вакви одлуки од надлежните тела и инстанци се јасен показател дека НЕ СМЕЕ да се повторуваат вакви дела во иднина.“
Тој исто така остро ги критикуваше колегите кои не ја поддржале Дијана:
„ГОЛЕМО УА за поголемиот дел од колегите музичари кои замолчeа, замижаа, ги снема или пак се ситеа без да се свесни дека со тоа даваат согласност и на нив да им се случи такво нешто во иднина.“
Дино и Дијана нагласија дека, и покрај предизвиците, продолжуваат со својата уметничка работа „онаму каде што ќе има простор за изразување на музиката и креативноста“ и каде нивниот придонес ќе биде препознаен како доблест, а не како закана кон „медиокритетот и неговите девијантни појави“.
Комисијата при крајот препорача Котевски во рок од 30 дена јавно да ѝ се извини на Дијана Имери Илкоска, а доколку тоа не го стори, најави покренување прекршочна постапка пред надлежен суд. Оваа одлука на КСЗД ја отвори јавната дебата за институционалната правда во културниот сектор, а се очекува и реакција од Министерството за култура и Владата.
