Румена Бужаровска, една од најпознатите македонски писателки, се заблагодари на читателската публика за огромниот успех што го доживува со последната книга, нејзиниот прв роман, „Тони“
„’Тони’ за неколку месеци го доживува третото издание, за што сум им многу благодарна на сите читатели. Наскоро романот ќе биде достапен на српски (Бука), хрватски (Фрактура), а посебно сум среќна што ќе биде објавен и од Галимар (Франција)“, напиша Бужаровска на социјалните мрежи и порача: „Се гледаме на саем!“
Непосредно пред 37. издание на Саемот на книга, првиот роман на писателката Румена Бужаровска, „Тони“, доби свое трето издание откако за само четири месеци беа распродадени 2.000 примероци.
А освен на македонски, „Тони“ наскоро ќе се чита на седум други европски јазици. И додека „Тони“ ја освојува Европа, нови успеси нижат и „Осмица“, „Мојот маж“ и „Господ, па Америка“, што дополнително го потврдува фактот дека Бужаровска е една од најпопуларните македонски писателки, велат од издавачката куќа „ТРИ“ чиј автор е Бужаровска.
Домашните читатели ќе имаат можност да се сретнат со Бужаровска и да добијат потпис на својот примерок на 9 мај (петок), на штандот на ТРИ на Саемот.
