Демократската унија за интеграција изразува, како што истакнуваат оттаму, сериозна загриженост за влошувањето на животниот стандард на граѓаните, како резултат на недоволните економски политики на Владата.
„Иако Владата се пофали со зголемување на платите за околу 1.600 денари, реалноста на терен покажува дека трошоците за живот во изминатата година се зголемени за најмалку 6.000 денари месечно по домаќинство. Ова значи дека граѓаните реално се соочуваат со пад на куповната моќ и секојдневно се борат да ги покријат основните потреби.
Цените на храната, електричната енергија, горивата и основните услуги бележат континуиран раст, додека мерките на Владата остануваат задоцнети и недоволни. Наместо системско решение граѓаните добиваат зголемување со кое не можаат да ги покриваат ни трошоците за храна и пијалаци.“
ДУИ оценува дека е неопходно итно преземање на конкретни мерки за стабилизирање на цените и заштита на животниот стандард. Во спротивно, како што велат, ќе продолжи трендот на осиромашување на граѓаните и зголемување на социјалната нееднаквост.
ДУИ, додаваат од партијата, останува посветена на предлагање реални и одржливи решенија кои ќе обезбедат економска стабилност и подобар живот за сите граѓани.
„Да почнеме со зголемување на минималната плата од 35.000 денари.“
