Градоначалникот Орце Ѓорѓиевски денеска, по повод Велики Четврток, учествуваше во хуманитарна акција насочена кон поддршка на бездомни и социјално загрозени лица.
Заедно со Тони Станковски и претставници на Здружението на граѓани за помош на бездомни и социјално загрозени лица, беа поделени повеќе од 300 оброци.
Акцијата имаше за цел да обезбеди основна поддршка и да испрати порака за солидарност и грижа кон најранливите категории граѓани. Од Општината информираат дека заложбите за подобрување на условите за живот продолжуваат, при што во изминатиот период се овозможени работни ангажмани и сместување за десетина лица кои претходно биле без дом.
„Како градоначалник, но пред сѐ како човек, ќе го дадам и последниот атом од себе за да обезбедиме подобри услови за сите, за да има што помалку вакви судбини и што повеќе достоинствени животи“, напиша Ѓорѓиевски.
Градоначалникот потенцира дека локалната самоуправа ќе продолжи со активности насочени кон намалување на социјалната исклученост и обезбедување достоинствен живот за сите граѓани.
