Граничниот премин Евзони денеска повторно ќе биде затворен за сите видови на возила поради протестите на грчките земјоделци.
Како што информираат од Автомото сојузот на Македонија, граничниот премин ќе биде затворен од 10 до 14 часот и од 18 до 22 часот.
Земјоделците протестираат поради доцнење во исплатата на земјоделските субвенции поддржани од Европската Унија.
Ова следи откако властите почнаа да ги преиспитуваат сите барања по откривањето на широко распространети лажни барања за земјоделски субвенции од ЕУ.
Десетици лица се уапсени поради наводно поднесување лажни барања како одговор на истрага водена од Европското јавно обвинителство.
За време на прелиминарната истрага, околу 324 лица се идентификувани како примачи на субвенции во вкупен износ од 19,6 милиони евра.
Независното тело на ЕУ за финансиски криминал кон крајот на октомври соопшти дека истрагата е поврзана со „систематска шема на измама со субвенции од големи размери и активности за перење пари“.
