Скопје се проектираше како град по мерка на човекот. Денес се прекројува по мерка на профитот. Урбанистичките планови се предмет на пазарење, јавниот интерес се повлекува пред приватниот, а просторот што треба да им припаѓа на сите се претвора во нечие лично богатство, велат од Левица.
„Поуката од 1963 година беше дека градот мора да се планира внимателно и одговорно кон идните генерации. Денес таа одговорност отстапува место на краткорочниот профит, дивоградбите и корупцијата. Градоначалници, министри свечено го одбележуваат 26 Јули, додека во остатокот од годината молчат пред оние што го распродаваат просторот метар по метар“, обвинуваат од оваа опозициска партија.
Сеќавањето нема вредност доколку се сведува на протокол и венци, додаваат оттаму. Вистинскиот однос кон 1963 година подразбира безбедно градење, неприкосновен јавен интерес, стручни урбанистички решенија и институции што не се виткаат пред градежниот капитал.
„Земјотресот од 1963 година не можеше да се спречи, но последиците од денешната негрижа можат. Ветерот што неодамна го погоди Скопје не беше толку катастрофален сам по себе, катастрофа беше сознанието дека град, кој некогаш бил пример за обнова и планирање, денес е толку запоставен и хаотичен што и временска непогода остава тешки последици што не би смееле да бидат нормална појава. Нашата обврска е да не дозволиме градот на солидарноста да биде град на беззаконието.“
По повод 63 години од катастрофалниот земјотрес во 1963 година, делегација на Левица составена од потпретседателот и пратеник м-р Реџеп Исмаил-Хактан, пратеникот и кандидат за градоначалник на Скопје на последните локални избори, Амар Мециновиќ, и советничката во Советот на Град Скопје, Дарја Мустафаоглу, положи свежо цвеќе на споменикот посветен на настраданите во скопската катастрофа.
