Кандидатот за градоначалник на Град Скопје од редовите на Левица, Амар Мециновиќ, уште еднаш побара од македонската влада да ја признае независноста на Палестина.
„Денес е 7 октомври. Уште пред една година, на денешен ден во Собранието поднесов декларација за признавање на државата Палестина, во име на пратеничката група на Левица“, потсети Амар Мециновиќ на прес-конференција и додаде дека иницијативата сè уште е во фиока.
Во меѓувреме, низа европски држави ја признаа Палестина, но Македонија ја пропушти можноста да се најде меѓу првите слободарски народи, наведуваат од Левица.
Мециновиќ реагираше и на изјавата на министерот за надворешни работи дека земјата не треба да биде „импулсивна и емотивна во носење одлуки“. „Што има импулсивно и емотивно во илјадници деца кои се убиени и во спречување на апартхејдски систем? Македонија мора да испрати порака дека е на страната на слободата.“
Уште еднаш апелираше до Владата да го артикулира ставот на народот, нагласувајќи дека Македонците секогаш биле на страната на ослободителните движења.
„Вазалската влада мора да собере храброст и да ја признае Палестина час поскоро“, порача Мециновиќ.
Во 2024 година Палестина ја признаа Барбадос, Јамајка, Тринидад и Тобаго, Бахами, Ирска, Норвешка, Шпанија, Словенија и Ерменија, а годинава во февруари тоа го направи Мексико, додека во септември ја признаа и Канада, Австралија, Обединетото Кралство, Португалија, Франција, Монако, Луксембург, Малта, Андора и Сан Марино.
