МВР ќе го разреши началникот од инцидентот со директорката во Демир Хисар

Министерството за внатрешни работи соопшти дека Одделот за внатрешна контрола при МВР констатирал непрофесионално однесување во случајот со Демир Хисар, и тој началник ќе биде разрешен.

„Министерството за внатрешни работи ја информира јавноста дека Одделот за внатрешна контрола при МВР, по извршени проверки во врска со објавеното видео за време на претрес во Демир Хисар, констатираше непрофесионално и неетично однесување на началник во ОВР Демир Хисар“, стои во соопптението и се додава дека за лицето е покрената дисциплинска постапка.

Со цел целосна непристрасност и објективност на истрагата, од МВР велат дека наведениот началник ќе биде разрешен од функцијата.

„МВР го осудува секој облик на насилство, незаконско или непрофесионално постапување. Полицијата е тука за да ги спроведува законите и да им служи на граѓаните“, се вели во соопштението.

МВР се огласи откако на социјалните мрежи е објавено видео на кое се гледа началникот пред домот на директорка на училиште во Демир Хисар и вербална расправија меѓу него и синот на жената. Началникот се слуша како прво вели дека е дојден да изврши претрес во домот на директорката, а потоа кажува дека таа треба да се јави на информативен разговор во полициска станица. Во дворот на куќата е и екипа на Брзата помош која му кажува на началникот дека жената има висок крвен притисок, а тој предлага на носилка да ја однесат во станица на информативен разговор по извршениот претрес.