Системот „Безбеден град“ за време на првиот пробен период на 1 декември евидентирал 110.000 прекршоци, додека според информациите од Министерството за внатрешни работи на 2 декември забележани се вкупно 50.652 прекршоци, што претставува намалување за половина на бројот на регистрирани прекршувања.
Од овие, 48.861 се однесуваат на прекршоци за брзина, 1.366 за минување на црвено светло и 425 за нерегистрирани возила.
Сите кои деновиве учествуваат во скопскиот сообраќај на било каков начин, можеа да осетат дека не се гази толку неконтролирано на гас, не се свири на тие што си почитуваат брзина, дека не се фаќа толку семафор на црвено, забележуваат од „НаТочак“, група ентузијасти со цел подобро велосипедско Скопје.
„Тоа покажува и дека само со опомени, системот ‘Безбеден град’ има ефект! А што ќе биде кога ќе почнат казните… Замислете: Скопје можеби нема да биде веќе бојно поле и ќе стане побезбедно и порелаксирано место за живеење. А таа цел вреди! Ни се допаѓало или не, секаде каде што има ред, постигнат е со казнување, неселективно!“, велат од „НаТочак“ и даваат поддршка на храброста и одлучноста да се спроведе „мерката која на краток рок носи негативни поени, но на среден и долг рок спасува животи“.
Понатаму, тие велат дека со оваа мерка горе-долу главните градски булевари ќе станат побезбедни, а за целосен ефект на безбедноста велат дека паралелно мора да се работи и на: физичко смирување (потесни ленти, шикани, подигнати пешачки премини) на сообраќајот на сите други (општински) улици зашто не може и не треба да има камера на секое ќоше, туку просторот да биде креиран за посакуваната брзина; подобрување на условите за движење со останатите превозни средства (јавен превоз, велосипеди, тротинети, пешачење) односно ослободување и заштита на тротоарите, со физичка заштита или со репресивни мерки - комунална полиција; подобри услови за јавен превоз итн.
„Во однос на ‘Безбеден град’ очекуваме МВР да биде отворено за конструктивните сугестии од граѓаните, впрочем затоа е и тест периодот, но во никој случај да не се отстапи од суштината!“, велат тие и потсетуваат зошто 50 км/час е речиси универзално максимално дозволено ограничување за населени места во светот и зошто не смее да има преголема толеранција на надминувањето.
НаТочак укажуваат дека:
- Од удар од возило со 50 км/час преживуваат 15-50% oд пешаците
- Од удар од возило со 60 км/час преживуваат 5-10% од пешаците
- Се тежнее дури и кон ограничувања од 30 км/час зашто при удар од возило со 30 км/час преживуваат 90% од пешаците
Разликата не е линиска, туку експоненцијална, велат од „НаТочак“ и додаваат дека ако има толеранција од 5 или 10 км/час над 50 км/час, тоа не е толеранција, „тоа е веќе воведување на ново повисоко брзинско ограничување ‘на задна врата’, кое повторно поединци ќе имаат проблем да го одржат и кое има значаен ефект врз (не)безбедноста!“
„Да, најголем проблем се тие кои возат над 100 км/час, тие предизвикуваат 100% смртност. Но голем проблем се и тие кои возат над 50 км/час според горните статистики. Тие предизвикуваат 90% смртност. Возете под 50 км/час и нема да добивате казни“, апелираат од „НаТочак“.
