На денешен ден, пред точно 35 години, загина војникот Сашко Гешовски како прва жртва на братоубиствената војна со која се распадна Југославија.
Во Сплит се одржуваа масовни демонстрации пред Командниот центар на војнопоморската област, а младиот кавадарчанец беше еден од задолжените за одржување на редот пред центарот. Во него биле испукани четири куршуми од страна на маскирано лице. Утредента во Кавадарци се одржа масовен протест, а на неговиот погреб присуствуваа над 20 илјади луѓе.
Роден во 1971 година, Сашко Гешовски имаше само 19 години. Во октомври 1990 почнал со отслужување на воениот рок, токму во Сплит и тоа во касарната „Драчевац“. Тој кобен ден, ни крив ни должен, настрадал вршејќи си ја должноста, во конфликт во кој Македонија не ни учествуваше.
Од ЈНА требало да излезе во септември 1991 година, но излегол неколку месеци порано, на најтрагичниот начин. Гешовски стана симбол на бесмислената братоубиствената војна во Југославија.
