Скопје денеска одбележува 81 година од ослободувањето во Втората светска војна. Делегации од институции и организации ќе оддадат почит и ќе положат цвеќе на Партизанските гробишта во Бутел на Алејата на заслужните граѓани и на споменикот „Ослободители на Скопје“ на платото пред владината зграда.
На овој ден традиционално Град Скопје ја доделува наградата 13 Ноември на поединци и институции кои со својата работа придонеле за развојот и афирмацијата на главниот град.
На 13 ноември 1944 година борците од 42. и 50. дивизија на Народноослободителната македонска војска и 16. Македонска бригада го ослободиле Скопје од фашистичката окупација.
По неколкудневни тешки борби со припадниците на 22. гренадирска германска дивизија, составена од 47. и 65. полк и делови од 11. воздухопловна десантна дивизија, како и со германската тврдинска бригада „Ангермилер“ која била распоредена пред Качаничката Клисура, борците со победоносен марш влегле во градот.
Во борбите за ослободување на Скопје загинале 420 македонски борци, а вкупно за време на Втората светска војна животите ги положиле над 4.600 скопјани.
Македонија за време на Втората светска војна била на страната на антифашистичката коалиција. Во борбите против фашистичките окупатори, според проценките на историчарите, во Македонија загинале 33.000 луѓе, вклучувајќи ги и преку 7.000 македонски Евреи, кои биле депортирани во концентрацискиот логор Треблинка од страна на бугарските и германските окупатори.
