10 дена масовни протести во Албанија против луксузниот проект на семејството Трамп

Протетсите против планираниот проект во заштитеното подрачје Звернец вчера продолжија во Албанија десетти ден по ред.

Илјадници демонстранти во Тирана бараат оставка од премиерот Еди Рама и прекин на сите работи, велејќи под слоганот „Албанија не е на продажба“ дека нема да се откажат додека не се исполнат нивните барања, јавува Anadoly Agency.

Протестниот марш во главниот град започна од плоштадот Скендербег кон Булеварот на националните херои и застана пред канцеларијата на албанскиот премиер. Носејќи национални знамиња и транспаренти со пораки против владата, демонстрантите најавија дека ќе продолжат со своите протести.

Протестите не се ограничени само на Тирана. Во последните денови, слични собири се организирани и во други градови низ земјата, а протестираа и Албанци што живеат во неколку европски земји.

Серијата протести беше предизвикана од инцидент што се случи на 30 мај во областа Звернец. Според снимки објавени на социјалните мрежи, обезбедувањето на приватна компанија влечело граѓанин, предизвикувајќи негодување и бран протести во Тирана.

Во последните денови се појавија и обвинувања дека контроверзниот проект е поврзан со Џаред Кушнер, зет на американскиот претседател Доналд Трамп.

Премиерот Еди Рама по повод ова изјави дека проектот Звернец се спроведува во согласност со сите законски и еколошки процедури. Сепак, тој призна дека сè уште нема конечен проект и не е подготвена сеопфатна студија за влијанието врз животната средина.

Албанските медиуми објавија дека Специјалното обвинителство за борба против корупцијата и организираниот криминал (SPAK) започнало истрага за случајот Звернец, но нема официјално соопштение од самото обвинителство.