Додик по обидот да биде уапсен: Србите нема да одат во војна - но вие обидете се

Припадниците на Државната агенција за истраги и заштита (СИПА) вчера пристигнаа во административниот центар на Владата на Република Српска во источно Сараево, каде тогаш престојуваше претседателот на РС Милорад Додик, објави Klix.ba.

Според достапните информации, членови на СИПА се обиделе да го приведат Додик, но на тоа се спротивставиле припадници на Министерството за внатрешни работи на Република Српска. При обидот за апсење не била употребена сила.

„Можам да потврдам дека членовите на СИПА беа во Административниот центар на Владата на Република Српска во Источно Сараево, постапувајќи по наредба на Судот на Босна и Херцеговина во врска со кривичното дело - неизвршување на одлуката на Уставниот суд. Тие се обидоа да ја спроведат таа наредба, но беа спречени од страна на припадници на МВР“, изјави портпаролката на СИПА Јелена Миовчиќ.

Министерот за внатрешни работи на Федерацијата на БиХ, Рамо Исак, потврди дека полицијата на ентитетот веднаш била ставена во состојба на готовност и ја критикуваше СИПА за лошо организираниот обид за апсење.

„Испраќањето на неколку инспектори во административниот центар на владата на РС во Источно Сараево со наредба да се обидат да го приведат Милорад Додик, сето тоа без помош на специјална единица СИПА, навистина фрла сомнеж врз способноста на државната агенција да обезбеди доследно почитување на законот на целата нејзина територија или зборува за неможноста на раководниот персонал да ја анализира и планира успешната операција“, рече Исак.

Да потсетиме, Судот на Босна и Херцеговина претходно распиша централна потерница за Милорад Додик, како и за премиерот на РС, Радован Вишковиќ и претседателот на Народното собрание на РС, Ненад Стевандиќ, по затворската казна за непочитување на одлуките на високиот претставник.

Во февруари, Судот на Босна и Херцеговина донесе првостепена пресуда со која го осуди претседателот на Република Српска, Милорад Додик, на една година затвор за неприменување на одлуките на високиот претставник. Покрај затворската казна, му е изречена и безбедносна мерка со која му се забранува да ја извршува функцијата претседател на Република Српска во период од шест години, почнувајќи од правосилноста на пресудата.

Додик претходно во текот на денот пристигна во Административниот центар во Источно Сараево, каде што планира вечерва да одржи состанок со градоначалникот и раководителите на општините кои го сочинуваат градот Источно Сараево.

Додик пред тоа престојуваше во Шековиќи каде во 16 часот присуствуваше на состанокот по повод почетокот на проектот за гасификација во источниот дел на Република Српска. Таа средба се одржа во зградата на општината, како што претходно соопштија од Кабинетот на претседателот на РС.

Откако припадници на СИПА се обидоа да го приведат претседателот на Република Српска, Милорад Додик, во Административниот центар на Владата на РС во источно Сараево, Додик даде жестоки изјави во кои рече дека Босна и Херцеговина може да преживее само ако нема, како што вели, „наметнувања“.

„Имотот е прашање над сите прашања. Доколку се направи обид да се наметне, на тој ден Република Српска ќе донесе одлука за независен статус. Ние ќе го одвоиме и ќе го браниме нашиот имот“, рече Додик.

Тој ги пофали постапките на ентитетската полиција за време на инцидентот и додаде: „Горд сум на нашата полиција, тие се патриоти. Предавниците се во опозиција. Дали некој навистина мисли дека полицијата, чија задача е да ги штити институциите на РС, ќе им се поклони на окупаторските сили што ги нарекуваме СИПА, Обвинителството, Судот, Шмит? Ако некој така мисли, тогаш е коњ. Луди се, појма немаат“.

Додик продолжи коментирајќи ги политичките односи на ниво на БиХ, особено кон Бошњаците: „Бошњаците ќе земат некој Бабаљ и потоа ќе сакаат да изградат нешто. Вие нема да изградите ништо. Во РС владата не е на ниво на БиХ. Вечерва беше јасно каде е владата, нека тужат ако сакаат“.

Тој продолжи со заканите до државните институции: „Во РС нема СИПА, а тие се обидуваат да се преправаат дека има. Полека губат сила. Еден ден веројатно ќе собереме 20 до 30 илјади луѓе, ќе ја блокираме зградата на СИПА, ќе ги земеме јајцата, ќе ги избркаме и чао. Мислите дека не можеме, не ни требаат пушки“.

Додик рече дека конфликтот не мора да се случи: „Да ја почитувавте Република Српска, ништо од ова нема да се случи. Тие не можат да ѝ нанесат штета на РС. Нивниот проблем е Додик, а добар им е Бабаљ. Земете ги и решавајте ги кризите“.

Како заклучок, тој рече дека е „голем во Источно Сараево“, што „одамна го нарече Блискоисточно“, и додаде: „Мора да седнат на маса. Ние не сме против Дејтонска Босна. Тие зборуваат за војна веќе два месеци. Србите нема да одат во војна - но вие обидете се“.