Полицијата во Нови Сад со пендреци ги тепаше демонстрантите пред факултетот

Пред Факултетот за спорт и физичко образование во Нови Сад, чиј влез беше блокиран од граѓани и студенти утрово, се случи инцидент кога полицијата почна да ја удира толпата со пендреци.

Полицијата претходно се обиде да се приближи до влезот на факултетот, но граѓани и студенти им застанаа на патот. Сепак, припадниците на жандармеријата успеаја да се пробијат до влезот користејќи солзавец и потиснувајќи ги граѓаните. Репортер на N1 од местото на настанот извести дека никој не влегол во самата зграда на факултетот.

Неколку лица беа повредени кога беше употребен солзавец, вклучувајќи го и новинарот Жарко Богосављевиќ.

Студентката Катарина, која учествуваше во возењето велосипед до Стразбур, исто така беше повредена. Таа паднала во несвест и била однесена со брза помош.

Студентите во зградата на факултетот фрлаа вода врз полицајците.

Интервентната полиција и жандармеријата наизменично ги тепаа граѓаните од двете страни, јавува N1. Насобраните скандираа: „Спуштете ги штитовите“, „Убијци“, „Одбијте ги наредбите“ и „Одете во пеколот“.

Голем број граѓани се собраа пред Факултетот, а претставници на студентските сојузи ги поканија сите жители на Нови Сад да им се придружат.

По инцидентот, ситуацијата делумно се смири.

Граѓани и студенти се собраа утрово пред Факултетот за спорт и физичко образование за да го спречат деканот Патрик Дрид да се обиде да ја пробие блокадата на факултетот.