Српски министер доживеа мозочен удар во ТВ-емисија во живо

Српскиот министер за јавни инвестиции Дарко Глишиќ доживеа мозочен удар утрово за време на гостувањето во утринската програма на телевизијата Пинк.

Глишиќ беше гостин во утринската програма на телевизијата Пинк, но одеднаш почна да пелтечи и не можеше да изговори ниту еден цел збор. Водителите го прашаа неколку пати дали се чувствува добро, но тој не можеше да одговори, па програмата беше прекината.

Глишиќ беше итно префрлен во болница, каде набрзо пристигна и српскиот претседател Александар Вучиќ. Глишиќ се смета за еден од неговите најблиски соработници.

Дарко Глишиќ е министер во Владата на Србија од мај 2024 година. Тој е член на Српската напредна партија од нејзиното основање, а од 2016 година е претседател на Извршниот одбор на СНС.

Главниот уредник на „Информер“, Драган Ј. Вучиќевиќ, изјави дека состојбата на Глишиќ е тешка.

„Ги добивме најновите информации за состојбата на Дарко Глишиќ. Операцијата е во тек, министерот Глишиќ е стабилен, но сè уште нема прогнози, неговата состојба е многу сериозна, неговиот живот е во опасност, во тек е хируршка интервенција. Тромб му го блокирал крвниот сад што води до мозокот. Многу е тешко да се даде каква било прогноза во овие ситуации“, рече Вучиќевиќ.