Помина една година откако студентите во Србија почнаа да ги блокираат факултетите и да се борат против режимот, барајќи правда за 16-те жртви кои загинаа при уривањето на настрешницата на Железничката станица во Нови Сад. Иако се чини дека протестите стивнаа, студентите велат дека всушност подготвуваат нешто „поголемо и помасовно“ за крајот на годината, пишува порталот Nova.rs.
Според информациите од порталот, студентите подготвуваат голема акција во пресрет на Новата година. Иако засега не сакаат да откриваат детали, велат дека имаат планирано активности.
„Сè уште е рано да се зборува за тоа, а граѓаните ќе бидат информирани навреме преку нашите профили на социјалните мрежи. Им благодариме од срце што нè поддржуваат и што се со нас секогаш кога ќе ги повикаме да нè поддржат“, велат студентите.
Студентите објаснуваат дека во моментов се фокусирани на развивање на програмата, поради што нема масовни собири. Тие веруваат дека протестите без одредена цел се губење енергија.
„Веруваме дека протестите не се во наша корист освен ако немаат одредена цел и адреса. Сè друго е губење енергија. Затоа, овие денови немаме ништо големо планирано, освен поддршка на други протести доколку сме поканети“, наведуваат тие.
Тие обрнуваат посебно внимание на ситуацијата околу зградата на Генералштабот и најавуваат протести доколку продолжи притисокот од државата.
„Доколку почнат да вршат поголем притисок врз Генералштабот, ќе има протести. Во моментов, целиот наш фокус, освен програмата, е на борбата за заштита на Генералштабот и зачувување на културното и историското наследство. Веруваме дека ситуацијата со Заводот за заштита на спомениците на културата и притисоците на кои се изложени е исклучително сериозна и бара целосно внимание од јавноста. Наш приоритет е да ја заштитиме историјата, правото на сеќавање и јавниот интерес“, истакнуваат студентите.
Тие исто така ги повторуваат своите барања, од кои не се откажуваат.
„Нашите барања се укинување на таканаречениот лекс специјалис за комплексот и парцелата на Генералштабот, поништување на незаконската одлука на Владата на Република Србија и враќање на статусот на културно добро на Генералштабот. Исто така, бараме завршување на истрагата од страна на Обвинителството за организиран криминал за фалсификувањето на документот со кој Владата на Србија го одзеде статусот на културно добро на Генералштабот во ноември 2024 година“, прецизираа тие.
Тие се осврнаа и на неодамнешните локални избори во Мионица, Неготин и Сечње, нагласувајќи дека борбата против „машинеријата на СНС“ не е завршена.
„Она што се случи беше донекаде очекувано. Видеата од Мионица, Неготин и Сечње ни покажуваат како се одржаа изборите таму и едно е сигурно - во секоја нормална држава ваквите избори треба да бидат поништени. Машинеријата на СНС згази сè пред себе, видовме како се тепаат луѓе и со тоа се бори оваа влада - криминал и корупција. Сепак, како што рекоа нашите колеги од Мионица, нема да дозволиме да ни ја одземат иднината што ни припаѓа и ќе бидеме уште посилни“, велат студентите.
Студентите додаваат дека со блокирањето на раскрсницата вчера, уште еднаш ги потсетија властите дека барањата што ги поставија пред повеќе од една година не се исполнети.
„Денес се навршуваат 13 месеци откако падна покривот на Железничката станица во Нови Сад, а барањата сè уште не се исполнети. Ќе бидеме на улица додека не добиеме правда, додека сите одговорни не бидат повикани на одговорност“, заклучуваат студентите.
