Две лица загинаа во пад на ултралесен авион кој вчера попладне исчезнал од радарот над Велебит во Хрватска. Остатоците од леталото и телата на жртвите биле пронајдени синоќа околу 22 часот во тешко пристапен предел на Националниот парк „Пакленица“.
Во големата операција за пребарување учествувале околу 35 припадници на Хрватската планинска спасувачка служба (HGSS).
„Нашите спасувачи преку радио околу 22 часот известија дека стигнале до локацијата и пронашле остатоци од ултралесен авион и, за жал, во авионот се пронајдени две тела“, изјави Петар Прпиќ од HGSS.
На прашањето дали силната бура која вчера зафати делови од Хрватска можела да биде причина за несреќата, Прпиќ рече дека не сака да шпекулира за причините за падот, но потврди дека временските услови биле лоши.
Хрватската контрола на воздушниот сообраќај претходно соопшти дека контактот со авионот со регистрација D-KWZE, кој летал од Чешка кон Задар, бил изгубен вчера во 16:14 часот, на околу 17 наутички милји североисточно од Задар.
Причините за несреќата допрва треба да бидат утврдени, а надлежните служби ќе спроведат истрага за околностите под кои дошло до падот.
