Еден од водечките членови на таканаречениот „балкански картел“ беше уапсен вчера во Црна Гора како дел од голема меѓународна операција во која, со поддршка на Европол, беа приведени вкупно дванаесет осомничени.
Операцијата беше спроведена истовремено во Црна Гора и Германија, каде што беа уапсени четири лица. Криминалната мрежа е осомничена за шверц на повеќетонски пратки кокаин во Европската Унија, пишува Европол.
Истрагата, која беше поддржана од црногорската и германската полиција, како и од властите во Австрија и Шпанија, се фокусираше на криминална ќелија вклучена во голема меѓународна трговија со кокаин и канабис. Се верува дека осомничените играле различни улоги во рамките на криминалната организација, од финансиери до координатори и логистичари задолжени за транспорт.
Црногорските судски власти ги обвинија осомничените за вмешаност во трговијата со 2,7 тони кокаин и 1,5 тони канабис помеѓу октомври 2024 година и април оваа година. Дрогата беше запленета во 12 одделни, претходни операции низ неколку земји од ЕУ и Јужна Америка.
Се верува дека мрежата за шверц користела поморски и воздушни патишта, транспортирајќи ја дрогата во контејнери за превоз и други тајни методи. Покрај кокаинот, се сомнева дека канабисот е шверцуван во ЕУ и од Албанија, Тајланд и САД.
Околу 100 полицајци учествуваа во денешните апсења и претреси во двете земји. Европол обезбеди постојана координација, размена на информации и аналитичка поддршка во текот на целата истрага, а собраните разузнавачки информации открија добро скриена мрежа што дејствувала на неколку континенти. Агенцијата, исто така, обезбеди финансиска поддршка за купување специјална опрема и други оперативни потреби.
Во операцијата учествуваа следните агенции: Австриската федерална служба за криминалистичка полиција (Bundeskriminalamt), Германската федерална канцеларија за криминалистичка полиција (Bundeskriminalamt) и Покраинската канцеларија за криминалистичка полиција Хесен (Hessisches Landeskriminalamt), црногорскиот Оддел за борба против дрога при Секторот за борба против криминал при Полициската управа и Шпанската цивилна гарда (Guardia Civil).
