Српскиот претседател Александар Вучиќ и албанскиот премиер Еди Рама, во заеднички авторски напис за германскиот весник Frankfurter Allgemeine Zeitung (FAZ), повикаа на забрзан процес на интеграција на Србија и Албанија во Европската Унија.
Тие предлагаат пат кон ЕУ што би подразбирал постепена интеграција во единствениот пазар и Шенген зоната, но без право на вето за новите членки.
Вучиќ и Рама ја опишаа својата идеја како функционална делумна интеграција што би послужила како меѓучекор за оживување на процесот на проширување на ЕУ и зголемување на стабилноста во регионот. Нивниот предлог вклучува постепена интеграција во единствениот пазар и Шенген зоната, но без право на комесар во Европската комисија, претставник во Европскиот парламент и право на вето, кои се права што ги уживаат полноправните членки.
Процесот на пристапување кон ЕУ за Србија и другите земји од Западен Балкан е во стагнација со години, бидејќи земјите-кандидатки не постигнаа доволен напредок во клучните области како што се владеењето на правото, борбата против корупцијата, слободата на медиумите и судските реформи.
„Во нашиот дел од Европа, во Западен Балкан - регион географски опкружен со ЕУ и историски поврзан со нејзината европска судбина - перспективата за членство останува најсилниот двигател на реформите, инвестициите и помирувањето“, напишаа лидерите на Србија и Албанија.
Во своето обраќање до Европската унија, тие рекоа: „Крајно време е ЕУ да препознае дека Западен Балкан претставува нов фронт за инвестирање во силата на Унијата“. Тие изјавија дека земјите-кандидатки сега заеднички бараат „реалистичен пат“ кон полноправно членство.
Забрзаната интеграција на подготвените кандидати, тврдат тие, би можела „да ја зајакне економската и политичката позиција на ЕУ, без да ја оптовари архитектурата на донесување одлуки на Унијата“.
Србија аплицираше за членство во ЕУ уште во 2009 година, но преговорите се во застој оттогаш. Покрај надворешната политика на Белград, лидерите на ЕУ изразија загриженост и за слободата на медиумите, реформата на изборниот закон и состојбата на граѓанското општество.
Албанија, заедно со Црна Гора, се смета за еден од најверојатните кандидати за пристапување во ЕУ. Сепак, борбата против корупцијата останува еден од најголемите предизвици.
