Претседателот на Србија, Александар Вучиќ, синоќа изјави дека ќе се сретне двапати со американскиот претседател Доналд Трамп во следните три до четири дена, пренесува Anadolu.
„Ќе се сретнам двапати, од различни причини, во следните четири дена. Не ме фаќајте за збор, ги измешав датумите и временските зони“, рече Вучиќ за време на обиколката на работите во новата детска клиника „Тиршова 2“, одговарајќи на новинарско прашање за тоа кога ќе се сретне со американскиот претседател, додавајќи дека „сè ќе се случи во следните три до четири дена“.
Тој, исто така, најави дека очекува италијанската премиерка Џорџа Мелони да го посети Белград во август или септември, која ја опиша, заедно со претседателката на Европската комисија, Урсула фон дер Лајен, како една од најмоќните жени во светот.
На прашањето на новинарите дали е подготвен по САД и Русија да „мавта низ Ниш“, Вучиќ рече дека не сака да го користи тој збор откако го користеле „блокадерите“, термин на Вучиќ за учесници во студентските протести и луѓе кои тивко им оддаваа почит на загинатите при уривањето на настрешницата.
„Подготвен сум за сериозен разговор со граѓаните на Ниш, за сериозни договори за иднината на Србија, а потоа ќе одам во Крагуевац, Нови Сад и на сите други места“, рече Вучиќ.
