Српскиот претседател Александар Вучиќ вчера повторно зборуваше за односите со Хрватска. Тој тврди дека Загреб го блокира европскиот пат на Србија.
„Зошто нашите соседи не сакаат да бидеме во ЕУ? Причината е едноставна. Тие мислеа дека во моментот кога ќе влезат во ЕУ и НАТО и кога оние кои не се однесуваа кон нивната земја, да кажам, како домаќин, ќе бидат на власт во Србија, дека сè е готово и дека ќе станат доминантна сила од Триглав до Истанбул на различни начини, а секако и во областа до Бугарија и Грција“, рече Вучиќ, објавија српските таблоиди.
„Откако Србија се издигна, буквално како феникс од пепелта, се разбуди и стана посилна, тие сакаат да ја ограничат силата на Србија. И во тоа нема голема филозофија. Затоа се обединети со Приштина, Тирана и сите други“, рече Вучиќ.
Зборувајќи за отворањето на Кластер 3 во преговорите за пристапување на Србија кон ЕУ (пакет од осум поглавја поврзани со медиумите, социјалната политика и вработувањето, претприемништвото и индустријата, образованието и културата и царинската унија), Вучиќ рече дека не е оптимист.
„Направивме сè, се обидовме, кога ќе се донесе одлука кластерот да не се отвори, тогаш е подобро Ана Брнабиќ да ви каже зошто тоа не се случи. Јас би бил најсреќен ако се отвори“, рече Вучиќ.
