Интерна истрага на Пентагон заклучи дека американскиот министер за одбрана Пит Хегсет ги прекршил правилата на одделот кога споделил класифицирани оперативни информации за планиран напад врз позициите на Хутите во Јемен во групен разговор на апликацијата Signal во март.
Според извор запознаен со извештајот, ваквите дејствија можело да ги загрозат животите на американските војници доколку комуникациите биле пресретнати од непријателска сила.
Апликацијата Signal не е одобрена за размена на класифицирани информации, но Хегсет и неколку други високи функционери ја користеле за да разменуваат детали за претстојниот напад. Во разговорот учествувале и сенаторот Џ.Д. Венс, директорот на ЦИА Џон Ратклиф и тогашниот советник за национална безбедност Мајк Валц. Нивните дејствија не биле разгледани бидејќи тие не се вработени во Министерството за одбрана.
Групниот разговор на Signal стана познат кога новинар на The Atlantic по грешка беше вклучен во групата. Според извештајот, информациите што ги споделил Хегсет биле класифицирани и нивното откривање можело да ја загрози безбедноста на американските сили, вклучително и пилотите од носачот на авиони USS Harry S Truman кои се подготвувале за операцијата.
Истражителите исто така рекоа дека Хегсет имал формално овластување да декласификува одредени податоци, но не е јасно дали тој всушност го сторил тоа пред да ги сподели информациите на необезбедена платформа.
Хегсет, според изворот, одбил да биде интервјуиран од страна на генералниот инспектор и испратил само кратка писмена изјава во која тврди дека не споделил ништо што би можело да ги загрози животите или мисијата, дека имал право на декласификација и дека верува дека истрагата е политички мотивирана.
Извештајот е доставен до Конгресот, а се очекува до крајот на неделата да биде објавена некласифицирана верзија.
Откако беа објавени наодите, потпретседателот на Комитетот за разузнавање на Сенатот, демократскиот конгресмен Марк Ворнер, го повика Хегсет веднаш да поднесе оставка.
„Истрагата заснована на докази јасно покажува дека секретарот Хегсет ги загрозил животите на американските пилоти. Со споделување на класифицирани оперативни детали во необезбеден групен разговор, тој создал неприфатливи ризици за безбедноста на нашите луѓе и оперативната тајност“, рече Ворнер.
Тој додаде дека генералниот инспектор имал сознанија за „повеќе разговори преку Signal“ што Хегсет ги користел за официјална комуникација, што укажува дека ова не е изолиран инцидент, туку „поширок модел на неодговорност“.
„Нашите војници заслужуваат лидерство кое нема да се коцка со нивната безбедност. Го кажав тоа и претходно и ќе го кажам повторно - Пит Хегсет мора да поднесе оставка или претседателот мора да го отстрани“, рече Ворнер.
Секретарот за одбрана брзо одговори на Х, отфрлајќи ги критиките и велејќи дека извештајот не ги потврдува наводите за споделување на класифицирани информации.
„Нема класифицирани информации. Целосно ослободување од вина. Случајот е затворен. Хутите бомбардирани до предавање. Ви благодарам за вашето внимание“, напиша Хегсет.
Се очекува објавувањето на јавната верзија на извештајот дополнително да ја разгори политичката дебата за безбедносните пропусти во највисоките структури на Пентагон.
