Италијанската премиерка Џорџа Мелони го осуди ширењето на deepfake слики генерирани од вештачка интелигенција, вклучувајќи ја и онаа на која таа е во долна облека, откако почнаа широко да се споделува онлајн. Мелони се огласи на Facebook откако сликата стана вирална и предизвика осуда од корисниците кои веруваа дека е вистинска, објави The Guardian.
„Во последните денови, циркулираа неколку лажни фотографии од мене, генерирани од вештачка интелигенција, кои некои претерано ревносни противници ги претставија како вистински“, напиша Мелони на Facebook во вторникот. „Морам да признаам, кој и да ги создал… дури и ме направил да изгледам убаво“, се пошегува таа.
„Сепак, фактот останува дека луѓето се подготвени да користат апсолутно сè овие денови за да напаѓаат и шират лаги.“
Во својата објава, таа сподели и контроверзна слика на која наводно се гледа во долна облека додека седи на кревет – дело кое стана вирално и предизвика бран осуди од корисниците убедени во неговата автентичност. „Навистина е срамно премиерката да се претстави во таква состојба. Тоа е недостојно за институционалната улога што ја има. Воопшто нема срам“, напиша еден корисник.
Во својата изјава, Мелони ги осуди ваквите практики како форма на онлајн злоупотреба, предупредувајќи дека сликите генерирани од вештачка интелигенција се сè поопасна алатка за заведување и повредување на поединци.
„Ова прашање оди подалеку од мене“, додаде таа. „Deepfake е опасна алатка бидејќи може да измами, манипулира и таргетира секого. Јас можам да се одбранам. Многу други не можат. Затоа секогаш треба да важи едно правило: проверете пред да верувате и размислете пред да споделите. Бидејќи денес ми се случува мене, утре може да му се случи секому.“
Борбата против ризиците што ги претставуваат вештачката интелигенција и deepfake содржина стана еден од клучните елементи на програмата на десничарската влада на премиерката Мелони.
Минатиот септември, Италија стана првата земја од ЕУ што одобри сеопфатен закон со кој се регулира употребата на вештачка интелигенција. Законот воведува затворски казни за оние што ја користат технологијата за да предизвикаат штета – вклучително и создавање deepfake содржина – и поставува ограничувања за пристап за деца.
Владата на Џорџа Мелони изјави дека законодавството, усогласено со историскиот Закон за вештачка интелигенција на ЕУ, претставува одлучувачки чекор во обликувањето на развојот и примената на вештачката интелигенција низ целата земја.
Законот следи по скандалот со порнографска веб-страница која објави изменети слики од истакнати италијански жени, вклучувајќи ги Мелони и лидерката на опозицијата Ели Шлајн, што предизвика бес во Италија.
Фотографиите – направени од социјалните медиуми или јавни настани и изменети со вулгарни и сексистички натписи – беа споделени на платформата со повеќе од 700.000 претплатници. Многу од нив прикажуваа политичарки од различни партии, манипулирани за да се истакнат делови од телото или да имплицираат сексуализирани пози.
Италијанската полиција нареди страницата да биде затворена, а обвинителите во Рим започнаа истрага под сомнение за кривични дела како што се нелегална дистрибуција на сексуално експлицитна содржина, т.н. порнографија за одмазда, како и клевета и изнуда.
